Zwe Sühn, Lukas 15.25-30

Lukas 15. 25-30

25 Dr euter Suhn isch no uf em Fäud[22] gsi. Won er i d Nechi vom Hus isch cho het er d Musig u ds Tanze ghört[23].

26 Da het är amene Bueb vomene Püetzer grüeft u ne gfragt was das söu.

27 Dä hets ihm de gseit: „Di Brüetsch isch hei cho! U di Vater het ds Muneli, wo mir gmeschtet hei, la metzge wiu er gsung isch zrügg cho.“

28 Da isch er hässig worde u het nid iche wöue.

Aber si Vater isch zu nim usecho[24] u het ihm wöue Muet mache.

29 Da seit dr Suhn zu sim Vater: „Lue, so mängs Jahr chrampfe ni wie ne Sklav[25] für di.

Geng[26] ha ni gmacht, was du gseit hesch.

U nie hesch du mir es Geissli gäh, für das i mit mine Fründe hät chönne feschte.

30 U itze, wo di Suhn da[27] zrügg chunnt. Dä wo di Bsitz mit Huere[28] verputzt het.

Itze metzgisch du ds Muneli, wo mir gmeschtet hei.“

31 Da seit er zu nim: „Mis liebe Ching[29],

Du bisch immer bi mir gsi. Aues was mir isch ghört o dir.

32 Häb doch Freud u bis zfride. Di Brüetsch isch gstorbe gsi u itz läbt er wider.

Er isch verlore gsi, u itz isch er wider gfunge!“[30]


[22] O dä Suhn isch nid bim Vater gsi. Mit sim Körper isch er zwar i dr Nechi gsi – aber sis Härz no kilometer wit vom Vater furt. Dr Värs 26 zeigt die Distanz zum Vater no dütlecher. Er het e Bueb vome Püetzer gfragt u nid direkt si Vater.

[23] Da cha me gseh, das Gott scho weis, was aues zumene guete Fescht ghört.

[24] Dr Vater macht ke Ungerschid. Er geit uf beidi Sühn zue.

[25] Dr euter Suhn het glich wie dr junger müeh mit sinere identität. O er het ds Gfüeu das sis „Suhn-si“ e agmessne Lohn für sini Leischitg u sis guete Betrage isch.

[26] U grad es paar Sekunde vorher het er nid wöue lose.

[27] Die Formulierig het im Griechische e verächtleche u distanzierte Ungerton.

[28] Woher weiss dä das? Bis itze her er ja no nid mit sim Brüetsch gredt. Vilech seit er das, wo ner miech, wenn er dörft!

[29] Er brucht die zärtlechi Ared für nes eigets Ching.

[30] Jesus seit nid, wie das dä Suhn uf die Iladig vom Vater reagiert het. Ir Situation, won er das Glichnis verzeut het redt er zu Pharisäer u Schriftgelehrte. Si si im Glichnis dr euter Suhn. Sie si agsproche u müesse ihri Antwort säuber gä.

Schreibe einen Kommentar

Deine E-Mail-Adresse wird nicht veröffentlicht.

*